Saturday, September 21, 2019
Home News Entertainment news బిలాల్ పూర్ పోలీస్ స్టేషన్ మూవీ రివ్యూ …

బిలాల్ పూర్ పోలీస్ స్టేషన్ మూవీ రివ్యూ …

0
2818
ఎంత పెద్ద నగరాల్లో నివసిస్తున్నా…మన మూలాలన్నీ గ్రామాల్లోనే ఉన్నాయి. అందుకే పల్లెటూరి సంగతులు, అక్కడి కథలు, సన్నివేశాలు మన మనసులకు వెంట‌నే హత్తుకుంటాయి. ఒక్కసారి అలా ప‌ల్లె జ్ఞాపకాలు గుర్తుకుతెస్తాయి. సినిమాల్లో ఇలాంటి కథలు చాలా తక్కువ. గతేడాది రంగస్థలం గ్రామీణ నేపథ్య చిత్రంగా ప్రేక్షకాదరణ పొందింది. తాజాగా బిలాల్ పూర్ పోలీస్ స్టేషన్ సినిమా అలాంటి అనుభూతినే అందిస్తోంది.

బిలాల్ పూర్ అనే ఊరికి కొత్తగా యువ పోలీసు అధికారి (మాగంటి శ్రీనాథ్) వస్తాడు. పోలీసు వృత్తిలో మంచి పేరు తెచ్చుకోవాలన్నది అతని కోరిక. సంఘ విద్రోహుల ఆనవాళ్లు లేకుండా చేయాలని సూర్య అనుకుంటాడు. ఇలాంటి ఆశయాలతో బిలాల్ పూర్ వచ్చిన సూర్యకు అక్కడ స్థానికంగా జరిగే గొడవలు చిరాకు కలిగిస్తుంటాయి. కోడి పోయిందని, విందులో మాంసం వడ్డించలేదని, దూడ పొడిచిందనే కేసులు స్టేషన్ కు వస్తుంటాయి. ఈ చిన్న చిన్న కేసులను చట్టప్రకారం ఎలా పరిష్కరించాలో అర్థం కాక అసహనానికి గురవుతుంటాడు సూర్య. సూర్య పనిచేసే స్టేషన్ లోనే సురేందర్ (గోరటి వెంకన్న) అనే హెడ్ కానిస్టేబుల్ పనిచేస్తుంటారు. ఊరిలో పుట్టి పెరిగిన వ్యక్తి ఆయ‌న‌… వృత్తిపరంగా పోలీస్ అయినా…అంతా ఒక్క కుటుంబ స‌భ్యుల బావా, అన్నా, బాబాయ్ అంటూ కలుపుగోలుగా ఉంటారు. ఈ క్రమంలో ఊరి వాళ్ల అతి చనువు పోలీసులకు ఇబ్బందిగా మారుతుంది. సురేందర్ మంచితనం సూర్యకు నచ్చదు. కఠినంగా ఉండాల‌ని సూచిస్తాడు. అయినా పరిస్థితి మారదు. సురేందర్ కూతురు శ్రీలత (శాన్వీ మేఘన) పాఠశాలలో ఉపాధ్యాయురాలిగా పనిచేస్తుంటుంది. ఆమెను చూడగానే ప్రేమలో పడతాడు సూర్య. ఇద్దరూ ఒకరినొకరు ప్రేమించుకుంటారు. మరోవైపు ఊరిలో కొందరు కుర్రాళ్లు చిన్న చిన్న దొంగతనాలకు అలవాటు పడుతుంటారు. వీళ్లను పట్టుకునేందుకు సూర్య ప్రయత్నిస్తుంటాడు. ఇంతలో ఊరిలో జరిగిన ఓ ఘోర ఘటన పోలీసులకు సవాలులా మారుతుంది. ఆ సంఘటన ఏంటి? దాన్ని పోలీసు అధికారి సూర్య ఎలా మార్చాడన్నది ఆసక్తికరంగా సాగే ముగింపు.

బిలాల్ పూర్ పోలీస్ స్టేషన్ చిత్రానికి మూల స్తంభంలా నిలిచారు గాయకుడు గోరటి వెంకన్న. హెడ్ కానిస్టేబుల్ సురేందర్ పాత్రలో ఆయన పాత్ర ఆకట్టుకుంటుంది. మన ఊరిలో చూసే పోలీసు బాబాయ్ లా సహజంగా నటించారు వెంకన్న. వినోద సన్నివేశాల్లో వెంకన్న నటన ఎంతగా నవ్విస్తుందో…పోలీసు వృత్తిలో బాధలను వివరించే క్రమంలో అంత భావోద్వేగాలతో సాగుతుంది. యువ పోలీసు అధికారి సూర్యగా మాగంటి శ్రీనాథ్ పాత్రోచితంగా నటించారు. యువ అధికారికి ఉండాల్సిన లక్షణాలు ఆయన నటనలో కనిపించాయి. శాన్వీ మేఘన అందమే కాదు అభినయంతోనూ ఆకట్టుకుంది. గ్రామంలో మనకు తెలిసిన అందమైన అమ్మాయిని గుర్తుకుతెస్తుంది. ఆర్ ఎస్ నందా ఉన్న సన్నివేశాలన్నీ నవ్వులు పూయించాయి. వెంకట్ గోవాడ, మల్లేష్, వైభవ్ తమ పాత్రలకు న్యాయం చేశారు.

బిలాల్ పూర్ పోలీస్ స్టేషన్ చిత్రాన్ని ఆద్యంతం సహజంగా, వినోదాత్మకంగా మలచడంలో యువ దర్శకుడు నాగసాయి మాకం విజయం సాధించారు. కొత్త దర్శకుడైనా ఎక్కడా తడబడకుండా వాణిజ్య అంశాలతో మేళవించి సినిమాను రూపొందించారు. మన చుట్టూ జరుగుతున్న కథలాగే బిలాల్ పూర్ సాగేలా చేశారు. తోట వి రమణ సినిమాటోగ్రఫీ సినిమాకు మరో ఆకర్షణగా నిలిచింది. పల్లె అందాలను తెరకెక్కించడంలో ఆయన కెమెరా కన్ను కొత్త పుంతలు తొక్కింది. పోలీస్ గొప్పదనం చెబుతూ సుద్దాల అశోక్ తేజ రాసిన నిద్దుర లేని కళ్లకు అడ్రస్, అలసట లేని కాళ్లకు సిలబస్ అనే పాట ఆయన సాహిత్య స్థాయిని చూపించింది. గోరటి వెంకన్న, మౌనశ్రీ మల్లిక్ పాటలు సాహిత్య విలువలతో సాగాయి. సాబూ వర్గీస్ సంగీతం కథకు మరింత బలాన్నిచ్చింది. ఎంఎస్ క్రియేషన్స్ సంస్థ ఉన్నత నిర్మాణ విలువలు ఉన్నాయి. నిర్మాత మహంకాళీ శ్రీనివాస్ కు తొలి చిత్రమైనా మంచి సినిమా చేయాలనుకునే తన అభిరుచి చూపించారు.

పంచ్‌లైన్ః అర్థవంతమైన సినిమా కావాలని కోరుకునే ప్రేక్షకులకు మంచి ఎంపిక బిలాల్ పూర్ పోలీస్ స్టేషన్. ఒక విధంగా చెప్పాలంటే ఇది మన ప్రజా జీవనానికి అద్దం పట్టే సినిమా

ఫిల్మ్‌జ‌ల్సా రేటింగ్ః -2.75/5 …!

LEAVE A REPLY

Please enter your comment!
Please enter your name here