చైతూ ఈ సారైనా శ్వాస తీసుకుంటాడా..


అన్నీ ఉన్నా అల్లుడి నోట్లో శ‌ని ఉంద‌న్న‌ట్లు, సినిమా షూటింగ్ అంతా అయిపోయినా, కొన్ని సినిమాలు మాత్రం విడుద‌ల‌కు ఎన్నో వాయిదాలు ప‌డుతుంటాయి. ఆ లిస్ట్ లో ఒక‌టైన సినిమా, ఎట్టకేలకు విడుదలయ్యేలా కనిపిస్తోంది. గౌతమ్ మీనన్, నాగ చైత‌న్య కాంబినేషన్లో తెరకెక్కిన ‘సాహసం శ్వాసగా సాగిపో’ నవంబర్లో పక్కాగా రిలీజయ్యేలా కనిపిస్తోంది. ఈ సినిమా రిలీజ్ డేట్ గురించి గత కొన్ని నెలలుగా ఎన్నెన్నో ఊహాగానాలు వచ్చినా స్పందించని గౌతమ్.. తాజాగా రిలీజ్ డేట్ ప్ర‌స్తావించాడు.
అయితే ఈ చిత్రం తెలుగుతో పాటూ త‌మిళంలో కూడా తెర‌కెక్కుతున్న విష‌యం విదిత‌మే. తెలుగులో నాగ‌చైత‌న్య న‌టిస్తుండ‌గా, త‌మిళంలో శింబు న‌టిస్తున్నాడు. ఈ మూవీ తెలుగు వెర్ష‌న్ ఎప్పుడో రెడీ అయి, ఫ‌స్ట్ కాపీ కూడా చేతిలో పెట్టుకున్న‌ప్ప‌టికీ, తమిళ వెర్ష‌న్ విష‌యంలో మాత్రం ఇబ్బందుల కార‌ణంగా ఈ సినిమా లేట్ అయింది. అయితే ఇప్పుడు ఆ చిత్ర తమిళ వెర్షన్ విషయంలో ఇబ్బందులన్నీ తొలగిపోయినట్లు గౌతమ్ వెల్లడించాడు. తెలుగు వెర్షన్ ట్రైలర్ మూడు నెలల ముందే రిలీజవ్వగా.. తమిళ ట్రైలర్ ఇప్పుడే లాంచ్ చేయడం విశేషం. ఆదివారమే ట్రైలర్ రిలీజ్ చేశాడు గౌతమ్.
ఈ సందర్భంగా గౌతమ్ మీనన్ ట్విట్టర్లో.. ‘‘అచ్చం ఎన్బదు మదమాయద ఫైనల్ లెగ్ ప్రమోషన్లు ఈ ట్రైలర్ తోనే మొదలవుతున్నాయి. రిలీజ్ డేట్ కనుచూపు మేరలో కనిపిస్తోంది. త్వరలోనే ఇక్కడే ట్విట్ట‌ర్ లో వెల్లడిస్తా’’ అని పేర్కొన్నాడు. అంటే న‌వంబ‌ర్ లో ఈ సినిమా పక్కా అనుకోవచ్చు. ఇటీవ‌లే ప్రేమ‌మ్ తో హిట్ తో మంచి జోష్ లో ఉన్న చైతూకు న‌వంబ‌ర్ లో రిలీజ్ అంటే క‌లిసొచ్చే విష‌య‌మే. ఎన్నో వాయిదాల త‌ర్వాత వ‌చ్చే సినిమా అయిన‌ప్ప‌టికీ, ఈ సినిమా మీద మంచి అంచ‌నాలే ఉన్నాయి. మంజిమా మోహ‌న్ తెలుగు, త‌మిళ భాష‌ల్లో హీరోయిన్ గా న‌టిస్తుంది.