‘F2’ మూవీ రివ్యూ

0
1075
అనిల్ రావిపూడి.. ఇప్ప‌టివ‌ర‌కు త‌ను డైర‌క్ష‌న్ చేసిన‌వి మూడు సినిమాలే అయిన‌ప్ప‌టికీ… ఆ మూడింటిలో క‌థ‌కు, క‌మ‌ర్షియ‌ల్ ఎలిమెంట్స్ కు చోటు లేక‌పోయినా.. ప్ర‌తీ సీన్ లో కామెడీని జోడించి ప్రేక్ష‌కుల‌ను క‌డుపుబ్బా న‌వ్వించ‌క‌పోయినా.. ప్రేక్ష‌కుడిని ఎక్క‌డ ఎలా ఎంట‌ర్‌టైన్ చేయాలో అక్క‌డ అలా ఎంట‌ర్‌టైన్ చేయగ‌ల కెపాసిటీ ఉన్న ద‌ర్శ‌కుడు. అందుకే అనిల్ ద‌ర్శ‌కత్వంలో వ‌చ్చిన మూడు సినిమాలు మంచి విజ‌యం సాధించాయి. ఇప్పుడు అనిల్ రావిపూడి.. వెంక‌టేష్ , వ‌రుణ్ తేజ్ లు కలిసి ‘ఫ‌న్ అండ్ ఫ్ర‌స్ట్రేషన్’ అంటూ కామెడీ ఎంట‌ర్‌టైన‌ర్ ను దిల్ రాజు నిర్మాణంలో తెర‌కెక్కించాడు. గత ఏడాది ఒక్క సినిమా కూడా విడుదల చెయ్యని వెంకటేష్… ఈ ఏడాది సంక్రాంతికి వరుణ్ తేజ్ తో కలిసి కామెడీ చెయ్యడానికి ప్రేక్షకుల ముందుకు వచ్చేసాడు. ఇక గత ఏడాది తొలి ప్రేమతో బిగ్గెస్ట్ హిట్, అంతరిక్షంలో యావరేజ్ అందుకున్న వరుణ్ సీనియర్ హీరో వెంకీతో కలిసి ఈ సినిమాలో నటించాడు. మ‌రి వీరి కాంబినేష‌న్ ఏ మేర వ‌ర్క‌వుట్ అయింది? గత ఏడాది మొత్తం చేతులు వ‌రుస ప‌రాజ‌యాల‌తో చేతులు కాల్చుకున్న దిల్ రాజు కు ఈ సినిమా ఎంత‌మేర‌కు క‌లిసొచ్చింది? అనిల్ రావిపూడి త‌న విజ‌యాల ప‌రంపర‌ను కొన‌సాగించాడా అన్న‌ది స‌మీక్ష‌లో చూద్దాం.

హారిక‌(త‌మ‌న్నా), హ‌నీ(మెహ‌రీన్‌) అక్కా చెల్లెళ్లు. వెంకీ (వెంక‌టేష్‌) ఒక ఎమ్మెల్యే ద‌గ్గ‌ర పీఏగా ప‌నిచేస్తుంటాడు. హారిక‌ను పెళ్లి చేసుకుంటాడు. అప్పటివ‌ర‌కూ సాఫీగా సాగిపోతున్న వెంకీ జీవితం పెళ్లితో ఒక్క‌సారిగా మారిపోతుంది. భార్య‌, అత్త వెంకీని త‌మ చెప్పు చేత‌ల్లో పెట్టుకునేందుకు య‌త్నిస్తుంటారు. వ‌రుణ్ యాద‌వ్‌(వ‌రుణ్‌తేజ్‌) హ‌నీని ఇష్ట‌ప‌డ‌తాడు. అప్ప‌టికే అత్తింటి ప‌రిస్థితులు అర్థ‌మైన వెంకీ.. హ‌నీని పెళ్లి చేసుకోవ‌ద్ద‌ని వ‌రుణ్‌ యాద‌వ్‌ను హెచ్చ‌రిస్తాడు. ప్రేమ మ‌త్తులో వ‌రుణ్‌కు ఇవేవీ ప‌ట్ట‌వు. చివ‌ర‌కు హ‌నీని పెళ్లి చేసుకుంటాడు. అప్ప‌టి నుంచి అక్కాచెల్లెళ్ల ఆధిప‌త్యానికి తోడ‌ళ్లులు న‌లిగిపోతుంటారు. మీరిద్ద‌రూ ఎక్క‌డికైనా వెళ్లిపోండ‌ని, అప్పుడే అక్కాచెల్లెళ్లకు మీ విలువ తెలిసి వ‌స్తుంద‌ని, ప‌క్కింటి వ్య‌క్తి(రాజేంద్ర‌ప్ర‌సాద్‌) ఈ తోడ‌ల్లుళ్లకు స‌ల‌హా ఇస్తాడు. దీంతో ఇద్ద‌రూ యూర‌ప్ వెళ్తారు. అయితే, వెంకీ.. వ‌రుణ్‌ల‌తో పాటు, హారిక‌.. హ‌నీలు కూడా యూర‌ప్ వెళ్తారు. ఇంత‌కీ వీళ్లు యూర‌ప్ ఎందుకు వెళ్తారు? ప్ర‌కాష్ రాజ్ ఇంట్లోనే ఎందుకు దిగార‌న్న‌ది అస‌లు క‌థ‌. చివ‌ర‌కు పెళ్లాల‌ మనస్సు మార్చారా? లేక వెంకీ, వరుణ్ లే మారిపోయారా? అన్న‌ది తెర‌పై చూడాల్సిందే!

గత కొంతకాలంగా వెంకటేష్ .. అందరిలా హీరోయిజం చూపించే పాత్రల జోలికి వెళ్లకుండా తన వయసుకు తగిన పాత్రలను ఎంచుకుంటూ హిట్స్ కొడుతున్నాడు. దృశ్యం కానివ్వండి, గురు సినిమా కానివ్వండి వేటికవే వెంకటేష్ పాత్రల ప్రత్యేకతను తెలియజేస్తున్నాయి. తాజాగా ఎఫ్ 2 లోనూ వెంకటేష్ తనకు తగిన పాత్రనే ఎంచుకున్నాడు. వెంకీ పాత్రలో కామెడీ టైమింగ్ తో ఎప్పటిలాగే ఆకట్టుకున్నాడు. ఎప్ప‌టిలానే వెంకీ కామెడీ అదిరింది. లుక్స్, ఫ్ర‌స్ట్రేష‌న్ బాగా ఆకట్టుకున్నాయి. ఫన్ తో పాటుగా ఫ్ర‌స్ట్రేష‌న్ చూపిస్తూ సూపర్బ్ అనిపించాడు. అసలు సినిమాలో వెంకటేష్ పాత్రే మేజర్ హైలెట్. వ‌రుణ్ తేజ్ కూడా చ‌క్క‌గా న‌టించాడు. తెలంగాణ యాస‌లో మాట్లాడడానికి కొద్దిగా కష్టపడ్డాడు. కాకపోతే తెలంగాణ యాస వరుణ్ తేజ్ కి అతికినట్లుగా అనిపించింది.. కానీ అందులో ఒరిజినాలిటీ కనబడలేదు. ప్రస్తుతం ఫేడవుడ్ హీరోయిన్స్ లిస్ట్ లో ఉన్న త‌మ‌న్నాకి చాలా రోజుల త‌ర్వాత పూర్తి స్థాయి హీరోయిన్ పాత్ర ఎఫ్ 2 లో దక్కింది. భర్తను ఏడిపించే భార్యగా ఆకట్టుకుంది. ఇక గ్లామర్ పరంగాను మోడరన్ గా ఉంది. మరో హీరోయిన్ మెహ‌రీన్ కూడా ప‌ర్వాలేద‌నిపించింది. తనని పొగిడించుకుంటూ హ్యాపీ ఫీల్ అయ్యే పాత్రలో మెహ్రీన్ నటన పర్లేదు. ర‌ఘుబాబు, రాజేంద్ర‌ప్ర‌సాద్‌, ప్ర‌కాష్‌రాజ్‌, నాజ‌ర్‌లు, హరితేజ ఇలా ప్ర‌తి పాత్ర కామెడీ కోసం సెట్ చేసిన పాత్రలే. ఇక మిగతా నటులు కూడా తమ పరిధిమేర ఆకట్టుకున్నారు.

దర్శకుడు అనిల్ రావిపూడి మాస్, ఫ్యామిలీ ఓరియెంటెడ్ చిత్రాలకన్నా ఎక్కువగా కామెడీ ఎంటర్టైన్మెంట్స్ ని చెయ్యడానికే ఇంట్రెస్ట్ చూపిస్తాడు. ఎందుకంటే సినిమాలో కామెడీ వర్కౌట్ అయ్యింది అంటే.. సినిమా ఆటోమాటిక్ గా హిట్ అవుతుంది. అందుకే సేఫ్ గా తన జోనర్ లోనే సినిమాలు చేసుకుపోతున్నాడు. కానీ కొన్నాళ్లకి కామెడీ మొహం మొత్తినా… ప్రస్తుతానికి బాగానే వర్కౌట్ అవుతుంది. అందుకే తనకు టచ్ లేని జోనర్ ని టచ్ చేయకుండా అతనికి కలిసొచ్చిన ఆ కామెడీనే ప్రతిసారి నమ్ముకుని సక్సెస్ సాధిస్తున్నాడు. ఈసారి కూడా వెంకటేష్ – వరుణ్ తేజ్ లతో ఫన్నీ గా ఫన్‌ అండ్‌ ఫ్రస్ట్రేషన్‌ తెరకెక్కించాడు. ర‌చ‌యిత‌గా అనిల్‌ రావిపూడి బాగా స‌క్సెస్ అయ్యాడు. త‌న బ‌లం కామెడీనే కాబ‌ట్టి.. దాన్ని సాధ్య‌మైనంత‌ వ‌ర‌కూ ప్ర‌తి సీన్‌లో పండించ‌డానికి ప్ర‌య‌త్నించాడు. కానీ, ఎఫ్‌ 2 చాలా చిన్న క‌థ‌. సినిమా మొదలైన కొద్దిసేపటికే కథ మ‌న‌కు అర్థ‌మైపోతుంది. ట్విస్టులు, హంగుల‌ వైపు వెళ్ల‌లేదు. ట్రైలర్ లో చూపించినట్లుగానే.. ఎఫ్ 2 సినిమా ఆద్యంతం కనబడుతుంది. ఎప్పుడు హ్యాపీగా ఉండే వారి లైఫ్ లోకి భార్యల రూపంలో ఫ్రస్ట్రేషన్‌ ఎంటరైతే వారి పరిస్థితి ఏంటి అనే దానికి అనిల్ రావిపూడి కామెడీ టచ్ ఇస్తూ తెరకెక్కించాడు. బయట జరిగే నిజమైన ఘటనలే అనిల్ ఇలా సినిమా రూపంలో ప్రేక్షకులకు అందించాడు. నిజ జీవితంలో భార్య బాధితుల జీవితాలు ఎలా ఉంటాయి అనేది మనం ఫన్ అండ్ ఫ్రస్ట్రేషన్‌ లో చూస్తాం. ఫస్ట్ హాఫ్ మొత్తం పూర్తిగా కామెడీ ప్రాధాన్యంగా సినిమాని నడిపించాడు. ప్ర‌తి సీన్‌ను న‌వ్వుల‌తో పండించాడు. ప్ర‌తి పాత్ర‌కు ఒక ప్ర‌త్యేక‌త ఉంటుంది. మెహ‌రీన్‌కు కూడా ఒక మేన‌రిజం ఇచ్చి, ఆ పాత్ర ప్ర‌త్యేకంగా క‌నిపించేలా చేశాడు. అత్తారింటిలో వెంక‌టేష్ చూపించే ఫ్ర‌స్ట్రేష‌న్ చూసి జనాలు ఖ‌చ్చితంగా న‌వ్వుకుంటారు. సంద‌ర్భానికి అనుగుణంగా కామెడీ రాసుకోవ‌డంలో ద‌ర్శ‌కుడు విజ‌యం సాధించాడు. ఎక్క‌డా విసుగు తెప్పించే కామెడీ ఉండ‌దు. ఫ‌స్టాఫ్ తో పోలిస్తే మాత్రం సెకండ్ హాఫ్ కాస్త వీక్ అయినట్లుగా అనిపిస్తుంది. సెకండ్ హాఫ్ లో సినిమా మొత్తం యూరప్ షిఫ్ట్ అవుతుంది. ఫస్ట్ హాఫ్ లో ఉన్న బలం, సెకండ్ హాఫ్ లో కనబడదు. అక్క‌డ‌క్క‌డా స‌న్నివేశాల‌ను పేర్చుకుంటూ వెళ్లిపోవ‌డంతో కాస్త సాగ‌దీత‌గా అనిపిస్తుంది. అయితే వెంకీ – తమన్నా, వరుణ్ – మెహ్రీన్ ల మధ్య వచ్చే సన్నివేశాలు మాత్రం ఆకట్టుకునేలా ఉన్నాయి. ఇక స‌మీర్ రెడ్డి సినిమాటోగ్ర‌ఫీ చాలా బావుంది. యూర‌ప్ సీన్స్ అన్నీ చాలా అందంగా చిత్రీక‌రించారు. దేవీ శ్రీ సంగీతంలో వ‌చ్చిన పాటలు ఫర్వాలేద‌నిపిస్తాయి. యూరప్ లో వ‌చ్చే ఒక పాట మాత్రం చాలా బావుంటుంది. పాట‌ల పిక్చ‌రైజేష‌న్ కూడా బావుంది. ఎడిటింగ్ బాగానే ఉంది కానీ సెకండాఫ్ ఇంకాస్త ట్రిమ్ చేసి ఉంటే ఇంకాస్త మెరుగ్గా ఉండేది. దిల్ రాజు ఎక్క‌డా కాంప్ర‌మైజ్ కాకుండా మంచి నిర్మాణ విలువ‌లు పాటించారు.

ప్ల‌స్ పాయింట్స్ః
వెంకటేష్
కామెడీ
డైరెక్ష‌న్

మైన‌స్ పాయింట్స్ః
సెకండాఫ్ లో కాస్త సాగ‌దీత‌

పంచ్‌లైన్ః వెంకీ ఈజ్ ద బెస్ట్!
ఫిల్మ్‌జ‌ల్సా రేటింగ్ః 3.5/5

LEAVE A REPLY

Please enter your comment!
Please enter your name here